शुभेच्छा पत्र- टी.एम.चौधरी सर

वाढदिवसाच्या सस्नेह शुभेच्छा

रुग्णवत्सल चंदन हृदयी माऊली आणि समाजाची माया-ममतेची सावली असलेले आदरणीय डॉ.विकासकाका,

वाढदिवसानिमित्त आपले अगदी मनाच्या गाभाऱ्यातून खूप खूप अभिनंदन... आणि अभीष्टचिंतन...!

श्री.काकासाहेब,

आपण म्हणजे एक चाफ्याचे फूल की जे स्वर्गातून धन्वंतरी देवाच्या खांद्यावरून महाराष्ट्राच्या धुळीत पडले.वैद्यकीय व्यवसातील एक सुंदर अन् गोड स्वप्न आपण आहात.

रूग्णसेवेचे पाईक तुम्ही

परोपकारी आचार

रूग्णांचा आधार तुम्ही

सदा त्यांचाच विचार

मायेच्या स्पर्शात तुमच्या

ईश्वराचा साक्षात्कार

असं आपल्या संदर्भात म्हटलं तर अतिशयोक्ती होणार नाही.

आधार दु:खितांचे होतात हाल ज्यांचे।

सेवेत धर्म आहे सेवेत तीर्थ आपुले।।

वैद्यकीय व्यवसायाला'सेवाधर्म' मानणारी बोटावर मोजता येतील अशी जी मंडळी आहेत.त्यांच्यात आपले स्थान अग्रणी,अव्वल आहे.जगायला संजीवनी देणारे 'देवमाणूस अन् देवदूत' आपण आहात.

"परमेश्वराने आम्हाला जन्म दिला पण काकांनी पुनर्जन्म दिला"

अशा भावपूर्ण शब्दांमध्ये आपल्या दवाखान्यातून औषधोपचार घेऊन पूर्ण बरे झालेले रुग्ण आपल्याप्रती व्यक्त करतात.हीच आपल्या रूग्णसेवेची खरी कमाई आहे.अनेकांना आयुष्यात स्वत:च्या पायावर उभं  राहण्याची असिम शक्ती देणारा'माणूस' म्हणूनही आपल्याला ओळखलं जातं.माणसाच्या मनातील शक्ती जागृत केली की कोणतंही असंभव काम शक्य होऊ शकतं.याचं मूर्तिमंत उदाहरण म्हणजे आपण आहात.

सदैव प्रसन्न,हासरा चेहरा तसेच उत्साही, चैतन्यदायी,आनंदी,स्वानंदी आणि परमानंदी आपलं व्यक्तिमत्व रुग्ण पाहताच त्याचा अर्धा आजार, वेदना व दु:ख नाहीसं करतं.

स्व.श्रध्देय आदरणीय ज्ञानतपस्वी, शिक्षणतज्ज्ञ नानासाहेबांनी दिलेले संस्कार घेऊन वैद्यकीय व्यवसायात पदार्पण केले आणि ते संस्कार आजही आपण अलंकारासारखे मिरवित आहात.आपल्या सेवादायी विचारातून प्रेरणा घेऊन रूग्ण व समाजसेवेसाठी आपले चिरंजीव डॉ.विनितदादा आणि डॉ.अमितदादा पुढे आलेले आहेत.हा दिलासा आपणास कुठल्याही पुरस्कारापेक्षा अधिक मोलाचा वाटतो.आपल्या जीवनाचं ईप्सित साध्य झाल्याचं समाधान आपल्या चिरंजीवांकडे पाहिल्यावर आपल्याला नक्कीच मिळत असेल.

डॉ‌.विनितदादा आणि डॉ.अमितदादा खऱ्याअर्थाने'कोरोनायोध्दा' ठरले आहेत.त्यांनी कोरोना काळात देवासमान काम केले.आपलं हरताळकर हॉस्पिटल म्हणजे देव्हारा आणि त्या देव्हाऱ्यातले देव म्हणजे डॉ.विनितदादा आणि डॉ.अमितदादा.

कोरोना आटोक्यात आणणं हे मोठं दिव्य होते.अशाही परिस्थितीत हार न मानता जेव्हा जवळचे लोक दूर राहत होते तेव्हा कोरोना रूग्णांना जगविण्यासाठी आपल्या स्वत:च्या जीवाची पर्वा न करता हे आपले डॉक्टर्स बंधूद्वय धडपडत होते.अहोरात्र झटून आपल्या सामाजिक दातृत्वाच्या भावनेचे व माणूसकीचे दर्शन त्यांनी घडविले.रूग्णांच्या पाठिशी खंबीरपणे उभे राहून रूग्णांना तसेच त्यांच्या नातेवाईकांना खचू न देता त्यांना धैर्य, स्थैर्य देण्याचं महान कार्य केले.यांची कामगिरी नक्कीच देवदूतापेक्षा कमी नाही, हे मात्र निर्विवाद...!

आदरणीय श्री.काकासाहेब आपण 'त्रिदेव' खरोखरच आदर्श रूग्ण व समाजसेवेचे प्रतीक आहात.आपल्या सेवामय कार्यास आमचा मानाचा त्रिवार मुजरा अन् कडक सलाम...!

पर्वत असतील अनेक

पण हिमालय ही शान आहे

वृक्ष असतील अनेक

पण चंदनाला मान आहे

खूप भेटले डॉक्टर्स पण...

आमच्या जीवनात, ह्रदयात काकासाहेब, आपणास आणि आपल्या हरताळकर परिवारास आदराचं अढळ स्थान आहे.

आपल्याला सेवामय कार्य करण्यासाठी निरामय उदंड दीर्घायुष्य लाभो.हीच ईश्वर चरणी अत्यंत मनापासून मनापर्यंत मनभरून प्रार्थना...!

प्रकटदिनाच्या अनेकोत्तम अनंत आभाळभर शुभेच्छा...

द्वारा- टी.एम.चौधरी सर

~संकलन-प्रसाद वैद्य